كل عام
و السكة خضرة مخضرة
و منورة …
سكة عبير.
كل عام
وانتم في أحضان الحبايب
و الصحاب الطيبين،
والشوق كبير.
كل عام
والسيرة زينة و الولد
و الزينة سيرة في البلد
و الخير كتير.
كل عام
و الوصل و المعروف سوى
زي الهوى
قادر … أمير.
كل عام
و بحبكم قلبي أسير…
كل عام و انتم بخير!
الحلم ليه بعيد
الحلم ليه قريب
ماسكه ما بين إيديا
لكن عشان أشوفه
لازم اغمض عينية
لازم اغمض عينية …
إن زاد بي شوقي يا حبيبي أعمل إيه … ؟
أكتب قصيدة و لا اغني و لا إيه … ؟
و لا أتوه في بحر حيرة
و روحي فيه تبقى أسيرة
مجدافها حزني
و زادها دمعي
و كل مرسى … روحي تلقى الجرح فيه … ؟
عبد الحميد محمد طه
7-9-2009
لازم يدور يدور …
في باله إنه واصل
في يوم لشيئ بذاته
إلهي في صفاته
إلهي في عطاه …
لازم يدور يدور …
درويش و يا ما دار
كما كوكب في مدار
إحساسه إنه فاهم
بالمعنى داري داري
بالغاية داري داري
خلاه دايما يدور …
إحساسه باليقين
ما خلهوش يشك
في إنه لجل يوصل
لازم يدور يدور …
علشان يلقى القبول
علشان يلقى الخلاص
علشان يلقى الحقيقة
علشان يلقى طريقة
لازم يدور يدور …
إيه هيئة المفازة ؟
أكيد الراحة هية
أكيد الراحة جاية
و أكيد في يوم حيوصل
و يقابل المفازة
لكن عشان يقابل
لازم يدور يدور …
و يوماتي يدور يدور
وبعد الدور يدور
و آخرة النهار
تنزاح عنه الغمامة
و يكتشف انه تور …
عبد الحميد محمد طه
9-7-2009
