مين كان يصدق اللي آمن بالنهار
وقال يا عتمة ليكي يوم.
آمن وصدق … إنه لأ
الظلم ظلم ، والحق حق
والحق يلزم له نهار …
مين كان يصدق لما ثار
وفرد دراعه ، وع الجدار
رسم له شمس ،
رسم طريق
ورسم وطن.
شوف الطريق
الشاب والشابة سوى بيمدوا فيه
والعشق في عنيهم لمصر
اللي في أول الطريق
واللي في آخر الطريق.
وشوف كمان حضن النهار
ضامم جموع المشتاقين له من سنين.
من كام زمان قبل النهار ده ما ضمهمش ؟
من كام زمان ؟!
شوف الملامح من جديد
شوف لابتسامة والدموع
شوف الرجوع
شوف الحقيقة بتتخلق تاني ، وشوف
ساعة ما هانت المهانة
والأمل بقى له حس
بقى له إيد
بقى له عين.
وارجع وعيد تاني النظر
ارجع ، وعيد …
شوف النهار
والشمس بتسلم علينا وتنبهر
الضي طالع من القلوب
قصاده عتمة بتنصهر
وبكره واضح
وألف أمس بينمحي
وألف جرح بينكشف عشان يطيب.
مين اللي قال محتاج عينين علشان تشوف ؟!
من اللي قال محتاج جسد علشان تعيش ؟!
صدق وآمن إنه لأ
الظلم ظلم ، والحق حق
والحق يلزم له نهار
علشان تشوف فيه الطريق
علشان تشوف فيه الوطن.
وآدي النهار ، بيبتدي … !
عبد الحميد محمد طه
٢٥-١-٢٠١٢
